PATHIAN THU, PATHIAN THAWKKHUM THILTIHTHEIHNA

II Timothea 3:16
Pathian Lehkha Thu zawng zawng hi Pathian thawkkhuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sawt bawk a ni.

Hebrai 4:12
Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang khawp hialin a chhun thei a, thinlunga ngaihtuah leh tumte hi a hre nghâl thei a ni.

A chunga Pathian Thu Tak kan tarlan hi uluk taka ngaihtuah chungin han chhiar nawn leh teh: Pathian thu thiltihtheihzia leh thuneihzia i hmuh phah ve em? Pathian thawkkhuma pek, nunna leh thlarau, ruhtuah leh thlîng pawh phel hrang thei khawpa hriam, thinlunga ngaihtuah leh tumte hre nghal thei khawpa thiltithei hi khawvel lehkhabu leh thu dang reng reng zingah hian a awm ve lo. Bible-a Pathian Thu kan hmuhte hi a lo thlawna luang ral mai mai a awm lo va, thil tih nei lovin a thawkkhumtu Pathian hnenah a kir leh ngai lo va, thil ti tura tirh a nihnaah chuan hlawhchham a nei ngai hek lo.

Kohhran pâwl țhenkhatte zingah kohhran thu chu thu tâwpa ngai an awm ve fo țhin a, chutiang mite chuan Pathian Thu in engtin nge a tih tih lam an ngaihven hman lo va, kohhran (hruaitu lu deuh) thu a nih tawh phawt chuan a kawi a ngilin an zawm hmiah țhin a. Chutiang mite chuan Pathian rawng an bawl lo (ti ila, an duh der bawk si lo) va, Pathian Thu Tak an puang ngai hek lo (ti leh ila, an inbuatsaih nasat ve tho avangin an duh leh dawn bawk si lo) va, mihring rawng bawlin, mihring thu bawk an hril țhin. 1 Petera 4:11 ah chuan, "Mi tupawhin thu a sawi chuan Pathian thute angin sawi rawh se; mi tupawhin rawng a bawl chuan Pathianin chakna a pêk ang zêlin bâwl rawh se; chutichuan Isua Krista avangin Pathian chu thil engkimah chawimawiin a awm thei ang," tih ziak kan hmu a. A chung lama kan sawi tâakte erawh chuan mihring tihlawm tum nun leh mahni pum rawngbawl bak an tlin lo va, chutiangin mihring thu bawk an hril țhin.

Hebrai 1:1-2
"Pathian, hmasanga thlahtute hnêna bung tam tak leh kawng tinrênga Zawlneitea thu lo sawitu khân, hêng ni tawpah hian keimahni hnenah a Fapaah chuan thu a sawi ta,"

Hebrai 2:1-4
Chuvangin benga kan hriatte kha țhahnemngai takin kan pawisa lehzual tur a ni, chutilochuan tawlh bo hlauh dah ang e. Vântirhkohte hmanga thu sawi mah kha a lo ngheh a, bawhchhiatna leh thu awih lohna tinrêngte chuan thungrulhna fel tak a hmuh zêl si chuan, heti kauva chhandamna ropui hi thlahthlam ila, engtin nge kan tlân chhuah theih tehlul ang? Chu mi chhandamna thu chu atîra Lalpa hmanga sawi a ni tawh a, a hretute chuan min tihnghehsak a; Pathian pawhin chhinchhiahnate leh thil makte leh thiltihtheihna tinrêngte nên, ama duh ang zêla Thlarau Thianghlim  thil semte nên chuan anni chu a hriatpui a."